ឯកឧត្តមបណ្ឌិត ថោង ខុន ទេសរដ្ឋមន្ដ្រី និងជាប្រធានគណៈកម្មាធិការជាតិអូឡាំពិកកម្ពុជា(NOCC) បានសម្ដែងការអរគុណ ចំពោះអត្តពលិកមកពីជុំវិញពិភពលោក ដែលបានជឿជាក់មកលើកម្ពុជា គឺជាគោលដៅទេសចរណ៍ ប្រកបដោយសុវត្ថិភាព និងភាពទាក់ទាញ។
ការអរគុណនេះ ធ្វើឡើងក្នុងឱកាសឯកឧត្តមអញ្ជើញជាអធិបតីក្នុងពិធីប្រគល់រង្វាន់ជ័យលាភី នៃទិវារត់ប្រណាំងឆ្លងកាត់ឧបសគ្គចម្ងាយឆ្ងាយអង្គរ(Angkor Ultra Trail) លើកទី៩ នៅល្ងាចថ្ងៃទី២៤ ខែមករា ឆ្នាំ២០២៦ នៅព្រះលានជល់ដំរី ដោយមានការចូលរួមពីឯកឧត្តម ហួត ហាក់ រដ្ឋមន្ដ្រីក្រសួងទេសចរណ៍, ឯកឧត្តមបណ្ឌិត ហង់ ពៅ អគ្គនាយកអាជ្ញាធរជាតិអប្សរា និងឯកឧត្តម លី សែ អគ្គនាយកដ្ឋានគ្រឹះស្ថានអង្គរ និងថ្នាក់ដឹកនាំក្រសួង-ស្ថាប័នពាក់ព័ន្ធជាច្រើនទៀត។
ពិធីបំពាក់មេដាយនេះ ក្រោយវិញ្ញាសាទាំង ៦ បានរកឃើញម្ចាស់ជយលាភី ពិសេសវិញ្ញាសារត់ចម្ងាយ ១០០គីឡូម៉ែត្រ បន្ទាប់ពីចំណាយពេលជាច្រើនម៉ោង ក្រោយចេញដំណើរកាលពីម៉ោង ៤ទៀបភ្លឺថ្ងៃសៅរ៍នេះ ដែលមានអត្តពលិកចូលរួមសរុប ១,៧៤០នាក់ មកពី ៥២ប្រទេស គ្រាដែលដែលប្រទេសចូលរួមច្រើនជាងគេ រួមមាន៖ កម្ពុជា, បារាំង, ចក្រភពអង់គ្លេស, អាមេរិក និងវៀតណាម។
ឯកឧត្តមបណ្ឌិត ថោង ខុន មានប្រសាសន៍ថា «ទាំងនេះបញ្ជាក់ឲ្យឃើញថា តំបន់សៀមរាបអង្គរ ដែលជាតំបន់បេតិកភណ្ឌពិភពលោក និងជាតំបន់ទេសចរណ៍ដ៏ល្បីល្បាញ គឺជាកន្លែងមានសុខសន្តិភាពពេញលេញ ពោពេញដោយភាពទាក់ទាញ ហើយខ្ញុំក៏សូមអរគុណដល់មិត្តភក្ដិកីឡាករទាំងអស់ ដែលបានជឿជាក់មកលើកម្ពុជា ជាគោលដៅទេសចរណ៍ ប្រកបដោយសុខសុវត្ថិភាព និងភាពទាក់ទាញ»។
យើងសង្ឃឹមថា ឆ្នាំ២០២៧ ខាងមុខ ត្រូវនឹងខួបលើកទី១០ នៃព្រឹត្តិការណ៍នេះ នឹងមានអត្តពលិកចូលរួមកាន់តែច្រើនថែមទៀត ជាមួយគម្រោងអភិវឌ្ឍធំៗជាច្រើនរបស់រាជរដ្ឋាភិបាល ជាអាទិ៍ការអនុវត្ត “ផែនការមេអភិវឌ្ឍទេសចរណ៍ ខេត្តសៀមរាប ឆ្នាំ២០២១-២០៣៥” ក្នុងទិសដៅជំរុញការអភិវឌ្ឍ តំបន់សៀមរាប-អង្គរ និងតំបន់ជុំវិញជាតំបន់ទេសចរណ៍បេតិកភណ្ឌពិភពលោកដ៏ល្បីល្បាញមួយ ប្រកបដោយនិរន្តរភាព និងការទទួលខុសត្រូវខ្ពស់ ស្របតាមទស្សនាទាន “អភិរក្សដើម្បីអភិវឌ្ឍ អភិវឌ្ឍដើម្បីអភិរក្ស”»។
គួរដឹងថា ព្រឹត្តិការណ៍កីឡាទេសចរណ៍បែបផ្សងព្រេងខាងលើ ត្រូវបានរៀបចំចំនួន ៩លើកមកហើយ ចាប់តាំងពីឆ្នាំ២០១៦ ជាមួយអត្តពលិកចូលរួមត្រឹមតែ ២៣២នាក់ប៉ុណ្ណោះ ក្រោមកិច្ចសហការ រួមគ្នារវាង NOCC និងក្រុមហ៊ុន Phoenix Voyages ដែលជាប្រតិបត្តិករទេសចរណ៍ដ៏ល្បីល្បាញលើពិភពលោក មានជំនាញ និង បទពិសោធន៍ខាងរៀបចំព្រឹត្តិការណ៍កីឡាទេសចរណ៍ និងទាក់ទាញទេសចរអន្តរជាតិ មកទស្សនាកម្ពុជា។
ព្រឹត្តិការណ៍នេះរៀបចំឡើងក្នុងគោលបំណងជំរុញការផ្សព្វផ្សាយសៀមរាបអង្គរជាគោលដៅទេសចរណ៍អន្តរជាតិ, អភិវឌ្ឍន៍ចលនាកីឡា, ជំរុញ និងបង្កើនការអភិវឌ្ឍសេដ្ឋកិច្ចក្រៅប្រព័ន្ធ, លើកកម្ពស់ បរិស្ថានតំបន់បេតិកភណ្ឌ, ជំរុញទាក់ទាញភ្ញៀវទេសចរ និងគាំទ្រគម្រោងមនុស្សធម៌ ដែលជាព្រឹត្តិការណ៍ដ៏កម្រ និងអស្ចារ្យ ដោយអ្នកចូលរួមត្រូវរត់កាត់តាមព្រៃព្រឹក្សា តំបន់ជនបទ ភូមិឋានប្រជាពលរដ្ឋ និងរត់ឆ្លងកាត់តាមប្រាសាទបុរាណជាច្រើននៅ តំបន់ឧទ្យានអង្គរ ដែលជាសម្បត្តិបេតិកភណ្ឌវប្បធម៌រូបីដ៏អស្ចារ្យ និងល្បីល្បាញបំផុត លើពិភពលោក។
សម្រាប់វិញ្ញាសារត់ក្នុងព្រឹត្តិការណ៍ប្រចាំឆ្នាំនេះ រួមមាន ៨គីឡូម៉ែត្រ, ១៨គីឡូម៉ែត្រ, ៣២គីឡូម៉ែត្រ, ៤២គីឡូម៉ែត្រ, ៦៤គីឡូម៉ែត្រ និង ១០០គីឡូម៉ែត្រ៕
