ព្រឹត្តិការណ៍កីឡាកុមារអូឡាំពិកជាការបណ្ដុះស្មារតីកីឡាដល់កុមារតាំងពីតូចៗឡើងទៅ។ នេះជាប្រសាសន៍របស់ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាក្នុងពិធីសន្និសីទសារព័ត៌មាននាព្រឹកថ្ងៃសៅរ៍ ទី២៤ ខែមករា ឆ្នាំ២០២៦ ស្ដីពីការរៀបចំព្រឹត្តិការណ៍កីឡាកុមារអូឡាំពិកលើកដំបូងនៅកម្ពុជា។
ឯកឧត្ដមរដ្ឋលេខាធិការក្រសួងអប់រំ យុវជន និងកីឡា លម្អិតបែបនេះ "៖នេះជាការបណ្ដុះស្មារតីកីឡាអូឡាំពិកដល់កុមារតាំងពីតូចៗទៅ ព្រោះឆ្នាំក្រោយៗនេះ ជាពិសេសនៅអាមេរិកដែលនឹងធ្វើម្ចាស់ផ្ទះអូឡាំពិកឆ្នាំ២០២៨ គេចង់ដឹងថា អត្តពលិកម្ចាស់ជយលាភីដែលចូលរួមប្រកួតហ្នឹង មានប៉ុន្មាននាក់ដែលធ្លាប់បានមេដាយកុមារអូឡាំពិកកាលពីនៅតូចៗ។ គេចង់ដឹងថា មាននរណាដែលបានផ្ដើមពីអូឡាំពិកកុមារ ទៅជាជើងឯកនៅព្រឹត្តិការណ៍អូឡាំពិកធំតែម្ដង។ នេះជាស្មារតីនៃការធ្វើជាគំរូដល់មនុស្សជាតិគ្រប់រូបលើពិភពលោកថា ការធ្វើសកម្មភាពកីឡាជារៀងរាល់ថ្ងៃ គឺជាឱសថទិព្វសម្រាប់បណ្ដុះស្មារតីដល់មនុស្សគ្រប់រូបក៏ដូចជាកុមារផងដែរ។ កាលណាកុមារមានភាពក្លាហាន រឹងមាំ ធ្វើឱ្យកុមារៀនសូត្របានល្អ។ ដូច្នេះនេះជាការជួបជុំគ្នាដើម្បីបង្ហាញពីគោលការណ៍ទាំងនេះ ហើយសង្ឃឹមថា អ្នកចូលរួមទាំងអស់គ្នានឹងមានភាពកក់ក្ដៅក្នុងការរៀបចំនេះ និងទទួលបានអនុស្សាវរីយ៍ល្អៗពីគណៈកម្មការជាតិអូឡាំពិកកម្ពុជា។"
ឯកឧត្ដម វ៉ាត់ ចំរើន បង្ហើបថា ក្រៅពីតែការរៀបចំនៅតាមប្រទេសរៀងៗខ្លួន ព្រឹត្តិការណ៍កុមារអូឡាំពិកនឹងពង្រីកសក្ដានុពលដល់កម្រិតតំបន់ ទ្វីប និងពិភពលោក ដែលជាឱកាសពិសេសដល់កុមារមានទេពកោសល្យអាចត្រូវបានជ្រើសរើសចូលរួមប្រកួតប្រជែងតំណាងប្រទេសលើឆាកអន្តរជាតិ។
ព្រឹត្តិការណ៍កីឡាកុមារអូឡាំពិកលើកដំបូងបង្អស់នៅកម្ពុជានឹងប្រព្រឹត្តទៅនៅរសៀលថ្ងៃអាទិត្យ ទី១ ខែកុម្ភៈ ឆ្នាំ២០២៦ នាផ្សារទំនើប AEON III មានជ័យ ដោយមានការចូលរួមពីកុមារា កុមារីតូចៗពីចន្លោះអាយុ១ឆ្នាំដល់៧ ជាង៣០០នាក់ និងប្រកួតប្រជែងលើ១០វិញ្ញាសា ដែលក្នុងវិញ្ញាសាទាំងនេះក៏ត្រូវបានបែងចែកទៅតាមកម្រិតអាយុដែរ។
ឯកឧត្ដម វ៉ាត់ ចំរើន សង្កត់ធ្ងន់ថា ព្រឹត្តិការណ៍កីឡាកុមារអូឡាំពិកមិនមែនជាការប្រកួតប្រជែងផ្ដោតលើជ័យជម្នះឡើយ តែជាការផ្ដល់ឱកាសដល់កុមារបានចូលរួមសកម្មភាពកីឡាតាំងពីតូចៗ និងរឹតចំណងរវាងកុមារ និងឪពុកម្ដាយកាន់តែស្អិតរមួត។ កុមារទាំងអស់មិនថា ឈ្នះ ឬចាញ់ទេ នឹងទទួលបានមេដាយ ក៏ដូចជាវត្ថុអនុស្សាវរីយ៍ផ្សេងៗដូចៗគ្នាដើម្បីទុកជាការចងចាំដ៏ល្អសម្រាប់កុមារ។ គណៈកម្មការធិការជាតិអូឡាំពិកកម្ពុជានឹងរៀបចំព្រឹត្តិការណ៍នេះជារៀងរាល់ឆ្នាំ៕
