កីឡាករឆ្នើម វី សុភ័ស្ស អះអាងថា នឹងប្រកួតអស់ពីសមត្ថភាពប្រកបដោយភាពជក់ចិត្តសម្រាប់ទស្សនិកជនក្នុងកម្មវិធីប្រដាល់សកលប្រចាំខែ Dragon the Golden Ring រៀបចំដោយសហព័ន្ធកីឡាប្រដាល់កម្ពុជា ក្រោមការឧបត្ថម្ភធំដោយក្រុមហ៊ុនវឌ្ឍនៈ។
កីឡាករជម្រើសជាតិប្រដាល់សកលកម្ពុជាដដែលសង្កត់ធ្ងន់ថា នេះជាឱកាសដ៏ល្អដើម្បីពង្រីកទីផ្សារកីឡាប្រដាល់សកលក្នុងស្រុក ក៏ដូចជាឱកាសសម្រាប់អត្តពលិកប្រដាល់សកលជាតិដើម្បីពង្រឹងសមត្ថភាពត្រៀមការប្រកួតកម្រិតអន្តរជាតិនានា។
កម្មវិធីប្រដាល់សកលអាជីពប្រចាំខែ Dragon the Golden Ring នឹងដំណើរការចាប់ពីថ្ងៃទី២៨ ខែកុម្ភៈ ឆ្នាំ ២០២៦ តទៅនៅសាលកីឡាប្រដាល់សកលកម្ពុជា នាពហុកីឡដ្ឋានជាតិអូឡាំពិក ដោយមាន៦គូក្នុងមួយសប្ដាហ៍។
ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជាមានប្រសាសន៍ថា កម្មវិធីពិសេសថ្មីនេះជាលក្ខណៈអាជីពតែម្ដង ដោយមិនមានការពាក់អាវ និងប្រដាប់ការពារក្បាលឡើយ ហើយផ្ដោតទាំងកម្រិតថ្នាល ក្រុមធំ និងមានទាំងគូអន្តរជាតិទៀតផង។
កម្មវិធីប្រដាល់សកលអាជីពប្រចាំខែ Dragon the Golden Ring នឹងប្រព្រឹត្តទៅចំនួនមួយខែម្ដង រហូតដល់ខែធ្នូ ឆ្នាំ ២០២៦៕
